साउन महिना विशेषगरी हिन्दु नारीहरूमा एउटा छुट्टै उत्साह
दिनेश भण्डारी सिन्धुपाल्चोक साउन महिना सुरु भएसँगै नेपाली समाज विशेषगरी हिन्दु नारीहरूमा एउटा छुट्टै उत्साह र भक्तिभाव झल्किन्छ। हरियालीको यो महिना जहाँ प्रकृति आफूलाई सिंगार्दै लचिलोपनका साथ ढल्किन्छ, त्यही ढंगले महिलाहरूको नाडीमा हरियो चुरा झन् चम्किलो देखिन्छ, कपडाको रंगमा न्यानोपन आउँछ र हत्केलामा मेहन्दीको गन्ध बासिन्छ। अहिले स–साना बालिका, युवती, अधबैंसे नारी हुन् या बृद्ध महिला, यतिबेला सबैको नाडीमा काँचका हरिया चुरा सजिएको देख्न पाइन्छ। साउन लागे लगत्तै हिन्दु महिलामा छुट्टै उत्साह र उमंग छाउँछ । रातो, पहेंलो र हरियो चुरापोते तथा कपडामा सजिएका महिलाको मन्दिर र बाटोघाटोमा चहल–पहल देखिन्छ। यो दृश्यले हाम्रो संस्कृतिको गहिराइ मात्र होइन, नारीहरूको धार्मिक आस्था र सांस्कृतिक सौन्दर्यलाई पनि उजागर गर्छ। साउनमा मेहन्दी, चुरा, साडी र व्रतको चलन केवल परम्परा पालना मात्रै होइन, जीवनशैलीमै र...
