२६ जना युवा महिलालाई स्कुटर चलाउने तालिम प्रदान

 चौतारा साँगाचोकगढी नगरपालिका वडा नं. १४ मा युवा महिलाहरूलाई आत्मनिर्भर, सक्षम तथा सशक्त बनाउने उद्देश्यले २६ जना युवा महिलाका लागि स्कुटर चलाउने तालिम सञ्चालन गरिएको छ। वडा स्तरीय महिला सञ्जालको सक्रियता तथा प्रस्तावमा आयोजना गरिएको उक्त तालिम वडा कार्यालयको समन्वय र थ्री एस मोटर ड्राइभिङ्ग सेन्टरको सहजीकरणमा सञ्चालन गरिएको हो। कार्यक्रमको प्रमुख अतिथिका रूपमा चौतारा साँगाचोकगढी नगरपालिकाकी उपप्रमुख सिता थापा सहभागी हुनुहुन्थ्यो। कार्यक्रमलाई सम्बोधन गर्दै उपप्रमुख थापाले महिलाको सशक्तीकरण केवल नीतिगत विषय मात्र नभई व्यवहारिक सीपसँग पनि जोडिएको बताउनुभयो। उहाँले महिलाहरू आर्थिक, सामाजिक तथा व्यक्तिगत रूपमा आत्मनिर्भर बन्न यस्ता सीपमूलक तालिमले महत्वपूर्ण योगदान पुर्‍याउने विश्वास व्यक्त गर्नुभयो। साथै, तालिम प्राप्त महिलाहरूले भविष्यमा स्कुटर खरिद गरी सवारी चालक अनुमति पत्र (लाइसेन्स) प्राप्त गरेर आफ्ना दैनिक कामकाज सहज बनाउन तथा स्वरोजगारका अवसर सिर्जना गर्न सक्ने बताउनुभयो। वडा अध्यक्ष उद्धव नेपालले महिलाहरूको क्षमता अभिवृद्धि र आत्मविश्वास विकासका लागि वडा कार्यालयले यस्ता कार्यक्रमलाई निरन्तर प्राथमिकता दिँदै आएको जानकारी दिनुभयो। उहाँले तालिमबाट प्राप्त ज्ञान र सीपलाई व्यवहारमा उतारेर महिलाहरूले आफ्नो जीवनस्तर सुधार गर्न सफल हुने अपेक्षा व्यक्त गर्नुभयो। तालिममा सहभागी २६ जना युवा महिलाहरूले स्कुटर सञ्चालन सम्बन्धी सैद्धान्तिक तथा व्यावहारिक ज्ञान प्राप्त गरेका छन्। सहभागीहरूले तालिमले आफूहरूमा आत्मविश्वास वृद्धि भएको र भविष्यमा लाइसेन्स प्राप्त गरी सुरक्षित रूपमा सवारी साधन सञ्चालन गर्न प्रेरणा मिलेको बताएका छन्। स्थानीय तह, वडा स्तरीय महिला सञ्जाल तथा सम्बन्धित सरोकारवालाहरूको सहकार्यमा सञ्चालन भएको यस कार्यक्रमले महिलाहरूको नेतृत्व विकास, आत्मनिर्भरता तथा आर्थिक सशक्तीकरणमा सकारात्मक योगदान पुर्‍याउने अपेक्षा गरिएको छ।