काठमाडौँ, २४ असारः प्रतिनिधिसभाका सांसदले किसानले झेल्दै आएका समस्या, प्राकृतिक प्रकोप व्यवस्थापनमा सुधार्नुपर्ने पक्ष तथा महिला हिंसालगायत समसामयिक विषयवस्तु उठाउनुभएको छ । प्रतिनिधिसभाको आजको आकम्मिक समयमा भाग लिँदै सांसद अभिषेकप्रताप शाहले बर्दियाका उखु किसानले लामो समयसम्म आफ्नो उत्पादन बिक्रीवापत पाउनुपर्ने रकमको भुक्तानी नपाएकोबारे सरकारको ध्यानाकर्षण गराउनुभयो । सांसद प्रकाश पाठकले कार्यस्थलमा श्रमिकको सुरक्षाको पूर्णप्रत्याभूति दिलाउने वातावरण बनाउन सरकार आग्रह गर्नुभयो । सांसद कन्हैया बनियाँले तराई–मधेसका किसानले समयमै रासायनिक मल र सिँचाइ प्राप्त गर्न नसक्दा अनेकौँ समस्या झेल्नु परेको बताउनुभयो । सांसद लक्ष्मीप्रसाद पोखरेलले कर्णाली राजमार्गको विस्तारसँगै स्तरोन्नतिका लागि आवश्यक बजेट छुट्याउनु माग गर्नुभयो । सांसद शाहजान खातुनले महिला तथा बालबालिका हिंसा कुनै पनि हालतमा स्वीकार्य नभएको जनाउँदै सभ्य र सुसंस्कृत समाज निर्माणको वातावरण बनाउन सबै पक्षसँग आह्वान गर्नुभयो । सांसद दीपकराज बोहराले महाकाली सिँचाइ आयोजनामा देखिएको समस्या समाधान गर्न सरकारले भारतसँग कूटनीतिक पहलको आवश्यकता औँल्याउनुभयो । सांसद कमल सुवेदीले समयमै सडकको मर्मतसम्भार, ग्राभेल र कालोपत्र नहुँदा वर्षायाम सुरु भएसँगै दाङका विभिन्न स्थानमा जाने सडक अस्तव्यस्त हुँदा स्थानीयले सास्ती खेप्न परेकाले त्यसप्रति सरकारको ध्यानाकर्षण गराउनुभयो । सांसद ऐनबहादुर महरले बझाङको सुर्मा गाउँपालिका–२ मा चट्याङ पर्दा पशुचौपाय तथा घरगोठ नोक्सानी भएकाले पीडित किसानलाई क्षतिपूर्तिको माग गर्नुभयो । सांसद हरिनादेवी कामीले वैदेशिक रोजगारका लागि भारत पुगेका डडेलधुराका भोजबोहरा बेपत्ता भएको जनाउँदै खोजीको माग गर्नुभयो । सांसद यज्ञमणि न्यौपानेले बिजुलीको खम्बामा चढ्ने मजदुरको सुरक्षाबारेमा राज्यले विशेष ध्यान पु¥याउनुपर्नेमा जोड दिनुभयो । सांसद पार्वती विकले प्राकृतिक प्रकोपबाट सिर्जित घटनामा नागरिकले भोग्नुपरेको नोक्सानीबापतको क्षतिपूर्ति उपलब्ध गराउन सरकारले ढिलाइ गर्न नहुने धारणा राख्नुभयो । सांसद नरेन्द्रकुमार केरुङले गतहप्ता आएको बाढीले सङ्खुवासभाको विद्यालय र जनजीवनमा पारेको प्रभावबारे सदनलाई जानकारी दिँदै त्यस क्षेत्रमा भू–गर्भविद्को टोली तत्काल खटाएर जोखिममा रहेका स्थानीयको सुरक्षा प्रदान गर्ने कार्ययोजना बनाउन सुझाव दिनुभयो । सांसद अरबिन्द साह कलैयामा सारिया खातुनको आत्महत्याको घटना साइबर बुलिङकारण भएको जनाउँदै यसले निम्त्याउने खतराबारे सरकार समयमै सचेत रहनुपर्ने धारणा राख्नुभयो ।
