नेपाली कांँग्रेसका केन्द्रीय सदस्य तथा पूर्वमन्त्री मोहन बहादुर बस्नेतले नेपालको राजनीति प्रतिशोधको प्रवृत्तिले ग्रसित भएको बताउँदै यसले देशलाई अस्थिर बनाएको टिप्पणी गर्नुभएको छ । प्रतिनिधिसभाको बैठकमा बोल्दै बस्नेतले सरकारमा बसेका मन्त्रीहरू सरकारबाट बाहिरिने बित्तिकै जेल जाने प्रवृत्ति देखिएको बताउनुभयो । देशको लागि राम्रो काम गर्न खोज्ने नेताहरूलाई प्रतिशोध स्वरूप कारबाही गर्ने प्रवृत्ति बढ्दै गएको छ, जसले गर्दा मुलुकमा राम्रो काम गर्न चाहने नेताहरूलाई स्थान नदिने अवस्था सिर्जना भएको बताउनुभयो । उहाँले नेपालको राजनीति पाकिस्तानी मोडेलमा गइसकेको समेत बताउनुभयो । बस्नेतले तातोपानी नाका बन्द भएकोमा दुख व्यक्त गर्दै बार्षिक २२ अर्बभन्दा बढी राजस्व सङ्कलन हुने तातोपानी भन्सारको बाटो स्थायी रूपमा सञ्चालन गर्नुपर्नेमा जोड दिनुभयो । उहाँका अनुसार, बन्देउदेखि तातोपानीसम्मको सडक निर्माणमा १७–१८ अर्ब खर्च लाग्ने भए पनि एकपटकको लगानीले स्थायी समाधान हुन सक्नेछ । उहाँले देशमा भ्रष्टाचारको विरोध गर्ने र राम्रा काम गर्नेहरूलाई स्थान नदिइने भन्दै आफैँ पनि जनपक्षीय काम गरेबापत कतै जेल जानुपर्ने हो कि भन्ने आशंका व्यक्त गर्नुभयो । एनसेल लगायतका काण्डहरूमा आवाज उठाउँदा आफूमाथि पनि आरोप लाग्ने गरेको उहाँले बताउनुभयो ।
